Numri aktual i të vdekurve dhe të sëmurëve nga koronavirusi në Zvicër

Zyra Federale e Shëndetit Publik (BAG) deri më sot, ka regjistruar 484 vdekje ndërsa agjencia Keystone-SDA, 572

Në Zvicër dhe në Principatën e Lihtenshtajnit, brenda 24 orëve të fundit janë regjistruar 1036 raste të reja të koronavirusit. Kështu, të premten, numri i njerëzve që vuanin nga Covid-19 ishte 19,303.

Ndërkaq numri i të vdekurve nga kjo sëmundje ndryshon shumë, në varësi nga burimi i të dhënave, shkruan albinfo.ch. Kështu, sipas agjencisë së lajmeve Keystone-SDA, deri më tash në Zvicër nga koronavirusi kanë vdekur 572 njerëz. Kjo agjenci është bazuar në informacionet e marra nga kantonet.

Ndërsa një numër tjetër, edhe më të madh të të vdekurve e jep platforma worldometer.info, përcjell albinfo.ch. Sipas saj, në Zvicër deri më sot janë numëruar 591 të vdekur dhe 19606 të infektuar.

Nga ana tjetër, Zyra Federale e Shëndetit Publik (BAG) deri më sot, e premte, ka regjistruar 484 vdekje nga kjo sëmundje.

Edhe dje, e enjte, kishte një dallim të theksuar në mes të shifrave të të vdekurve, të raportuar nga BAG dhe asaj nga Keystone-SDA: 432 viktima numëroheshin nga e para dhe 530 nga e dyta.

Për sa i përket numrit të të sëmurëve në raport me numrin e popullatës, kantonet: Ticino, Gjenevë, Vaud dhe Basel-Stadt vazhdojnë të jenë më të prekurit nga pandemia.

---