SHBA: Sondazhi i CNN-it, Biden udhëheq para presidentit aktual

Referuar sondazhit të mediumit amerikan CNN, ish-zëvendëspresidenti amerikan, Joe Biden, është në epërsi të konsiderueshme para presidentit aktual, Donald Trump, në garën për të parin e SHBA-së.

Joe Biden, sipas këtij sondazhi është duke udhëhequr me 53%, ndërsa presidenti aktual ka një mbështetje pre 43%
Bideni mban një epërsi mbi Trumpin sa u përket disa çështjeve kyçe, përfshirë përgjigjet ndaj shpërthimit të koronavirusit (52%-43%), kujdesit shëndetësor (57%-39%) dhe ndihmën për klasën e mesme (57%-38%). Por Trumpi e tejkalon Bidenin në garën se cili do t’ia dilte më mirë me ekonominë, me 50 për qind e votuesve që thonë se këtë e bën Trumpi e 46 për qind që janë pro Bidenit.

Bideni ka përkrahjen e 91 për qind të Demokratëve, përderisa Trumpi ka përkrahjen e 96 për qind të Republikanëve. Votuesit e pavarur janë më shumë në favor të Bidenit. Sa i përket ndarjes demografike, Bideni ka 62 për qind të grave, kundrejt 32 sa ka Trumpi, derisa Trumpi udhëheq në mesin e votuesve burra, me raport 51 me 44 për qind. Sipas sondazhit, Bideni përkrahet edhe nga votuesit me ngjyrë, por edhe të rinjtë.

Sondazhi është realizuar në 6 vende, me 1002 respondentë që ishin kontaktuar në mënyrë rastësore me telefon apo direkt.
Rezultatet kanë një margjinë gabimi prej 3.7%.

Zgjedhjet presidenciale në SHBA mbahën më 3 nëntor të këtij viti, përcjell Albinfo.ch.