LDK-ja sot vendos mandatarin

LDK-ja do të mbledhë sot Këshillin Drejtues

Lidhja Demokratike e Kosovës do të mbledhë sot Këshillin Drejtues për të biseduar rreth emrit për mandatarin për kryeministër.

Këtë lajm e bëri të ditur kreu i LDK-së, Isa Mustafa, të mërkurën pas takimit konsultativ me presidentin Hashim Thaçi, ku tha se qeveria e udhëhequr nga LDK-ja do të jetë qeveri e përbërë nga figura të pastra.

“Ne nesër do të kemi kryesinë e LDK-së që do të bisedojmë për mandatarin, do të konsultojmë Këshillin e Përgjithshëm. Do të marrim miratimin e tyre, meqenëse tani nuk kemi mundësi të thërrasim, do të flasim në mënyrë elektronike. Në momentin që e përfundojmë këtë, pastaj edhe një cikël do të vazhdojmë me partnerët dhe do të shohim për të argumentuar te presidenti se e kemi këtë shumicë”, tha ai.

Krahas kësaj, Mustafa para gazetarëve tha se qeveria e ardhshme do të marrë obligimet që i takojnë në dialogun me Serbinë.

---