Hoti: Do të merremi me pandeminë, dialogun e udhëheq qeveria

Avdullah Hoti është zgjedhur kandidat për kryeministër për qeverinë e re nga Lidhja Demokratike e Kosovës.

Para mediave, Hoti ka folur për herë të parë në këtë cilësi.

Ai ka thënë se qeveria e re e udhëhequr nga ai do të ketë mision parësor të merret me pandeminë e koronavirusit, si dhe pasojat ekonomike të tij, shkruan lajmi.net.

“Kjo qeveri po krijohet në rrethana specifike. Qeveria sfidë të parë do ta ketë menaxhimin e pandemisë, e sfida e dytë do të jetë rimëkëmbja ekonomike pas pandemisë. Krahas saj, çështja e dialogut është çështja e cila do të adresohet”, tha Hoti.

Hoti foli edhe për dialogun, për të cilin tha se do të udhëhiqet nga qeveria.

“Unë besoj që me vendimin e Kushtetueses kur është shfuqizu ligji për dialogun janë vendos kornizat e këtij procesi. Dialogu do të udhëhiqet nga qeveria e Kosovës. Unë besoj se do ta krijojmë një konsensus edhe brenda koalicionit, mirëpo edhe jashtë suazave të këtij koalicioni”, tha Hoti.

Ndërkaq, sa i përket reciprocitetit ndaj Serbisë, Hoti tha se masa të tilla mund të kenë sukses vetëm nëse merren në koordinim me partnerët ndërkombëtarë.

---