Sërish rënie e numrit të të infektuarve në Zvicër, mbi 20.600 të shëruar

Të mërkurën e kaluar ka pasur 205 raste; dje të enjten, janë raportuar 228 infeksione ndërsa të martën kanë qenë vetëm 119

Është ndalur sërish rritja relative e numrit të infeksioneve me koronavirus e shënuar në Zvicër dje dhe pardje. Siç njofton Zyra Federale e Shëndetit Publik (BAG), sot janë raportuar 181 infeksione të reja, shkruan sda.ch.

Të mërkurën e kaluar ka pasur 205 raste; dje të enjten, janë raportuar 228 infeksione ndërsa të martën kanë qenë vetëm 119.

Sipas Zyrës Federale të Shëndetit Publik, deri më tani ka pasur gjithsej 28.677 raste të infeksioneve, të konfirmuara nga laboratori.

BAG të premten ka raportuar 1309 vdekje. Zyra, si zakonisht, u referohet raporteve që laboratorët dhe mjekët kishin dorëzuar deri në mëngjesin e të premtes, si pjesë e detyrimit të raportimit, transmeton albinfo.ch. BAG shkruan se numri mund të devijojë në varësi nga numrat që raportojnë kantonet.

Ndërsa sipas platformës worldometers.info, deri më tani në Zvicër janë regjistruar 1551 vdekje nga koronavirusi. Po sipas saj, numri i të shëruarve tashmë ka arritur në 20.600.

Sipas agjencisë së lajmeve Keystone&SDA, deri më tani në vend janë regjistruar 1556 viktima.

BAG konfirmon se janë realizuar rreth 240,600 testime. 14 për qind e këtyre kanë rezultuar pozitive, përcjell albinfo.ch. BAG tani rekomandon testime për të gjithë pacientët me simptoma të Covid-19. Deri më tani janë testuar vetëm njerëzit me sëmundje të mëparshme dhe pacientët në spital, si dhe personeli shëndetësor.

---