Reagon Thaçi: Do ta respektoj vendimin e Kushtetueses

Presidenti i Kosovës, Hashim Thaçi është deklaruar menjëherë pas publikimit të vendimit të Gjykatës Kushtetuese ku është vendosur të pezullohet me masë të parakohshme dekreti i Presidentit për mandatarin për formimin e qeverisë.

Thaçi ka thënë se do të respektojë në plotëni vendimin e Gjykatës Kushtetuese dhe më tutje ka bërë thirrje te partitë politike në vend të bëjnë të njëjtën.

“Kosova ka tashmë një përvojë të çmueshme në respektimin e të gjitha vendimeve dhe aktgjykimeve të Gjykatës Kushtetuese. Kjo përvojë është një dëshmi e fuqishme e sundimit të ligjit në Republikën e Kosovës.”, ka thënë Thaçi.

Ky është postimi i tij i plotë:

“Sapo u njoftova për vendimin e Gjykatës Kushtetuese të Republikës së Kosovës. Si President i Republikës së Kosovës do ta respektoj në plotëni këtë vendim. Kosova ka tashmë një përvojë të çmueshme në respektimin e të gjitha vendimeve dhe aktgjykimeve të Gjykatës Kushtetuese. Kjo përvojë është një dëshmi e fuqishme e sundimit të ligjit në Republikën e Kosovës.

Si President i Republikës së Kosovës i ftoj të gjithë politikanët dhe subjektet politike në vend, që të sillen me maturi në respektim të Kushtetutës së Republikës së Kosovës.”

---