Nga 25 maji hapen pishinat në Cyrih

Pishinat do të hapen nga data 25 maj në Cyrih, por me disa rregulla

Qyteti më i madh në Zvicër, Cyrih do t’i hapë pishinat nga data 25 maj, përcjell albinfo.ch.

Gjithsej tetë pishina verore dhe pesë pishina të mbyllura do të hapin dyert e tyre për vizitorët përsëri të hënën, në qytetin e Cyrihut.

Përjashtim janë rastet kur mësimet e detyrueshme të notit zhvillohen në pishina të mbyllura – atëherë këto pishina mbesin të mbyllura për publikun.

Por, edhe pse do të hapen, duhet të respektohen shumë rregulla.

Për më tepër, numri i vizitorëve dhe kohëzgjatja e qëndrimit janë të kufizuara deri në njoftimin e mëtejshëm, përcjell tutje albinfo.ch.

Për çdo pishinë ekziston një numër i caktuar maksimal i personave të lejuar, të cilët mund të qëndrojnë në objektin e pishinës në të njëjtën kohë.

Në rastin e pishinave të mbyllura, për shembull, numri maksimal (me një përjashtim) është vetëm dhjetë njerëz në të njëjtën kohë.

Gjatësia maksimale e qëndrimit për person është e kufizuar në 90 minuta në mënyrë që sa më shumë notarë të jetë e mundur të përfitojnë nga hapja e pishinës.

 

---