Zemaj: Do të krijohet spital për të prekurit me COVID-19 në Kosovë

Facebook

Rritja e numrit të rasteve nga Covid-19 në Kosovë, ka mbingarkuar edhe sistemin shëndetësor.

Nga SHSKUK është thënë se janë në limitin e kapaciteteve për të trajtuar rastet që kanë nevojë për hospitalizim, si pasojë e keqësimit të gjendjes shëndetësore nga koronavirusi.

Por sot, ministri i Shëndetësisë, Armend Zemaj, paralajmëroi ndërtimin e një spitali portativ vetëm për pacientët e infektuar me COVID-19, shkruan albinfo.ch.

“Krahas masave që do t’i marrim menjëherë, jemi duke punuar në lehtësimin e funksionimit të sistemit shëndetësor, me riorganizimin e ambulancave specialistike dhe me krijimin e një spitali portativ vetëm për pacientët me COVID-19, pasi jemi të vetëdijshëm se me ngarkimin e QKUK-së, po rritet mundësia e infektimit me COVID-19 edhe e pacientëve që janë aty për trajtime të tjera”, tha Zemaj.

Ai theksoi se nga e hëna do të fillojë licencimi i spitaleve private për realizimin e testeve serologjike dhe atyre molekluare.

“Nga e hëna do të fillojë licencimi i laboratoreve private për realizimin e testeve serologjike dhe atyre molekulare”, shkroi Zemaj në Facebook.

Po ashtu, Zemaj ka paralajmëruar se do të shtohet numri i inspektorëve në terren, duke rritur kështu mundësinë për zbatimin strikt të masave të caktuara.