Rreth 1500 kosovarë janë shëruar në 10 ditët e fundit në Kosovë

Ilustrim Foto: Arben Llapashtica

Statistikat e fundit tregojnë se vetëm gjatë 24 orëve të fundit janë shëruar 205 pacientë, kurse në vetëm 10 ditët e fundit janë shëruar 1426.

Duhet theksuar se numri i përgjithshëm i të shëruarve deri më sot është gjithsej 6.616 raste, kurse numri i rasteve aktive është 3.999, transmeton albinfo.ch.

Kurse numri total i rasteve pozitive është 10.988, nga 42.627 persona të testuar për virusin SARS-CoV-2.

E gjatë 24 orëve të fundit, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 491 mostra të marra nga SHSKUK dhe gjurmimi i kontakteve të rasteve në terren prej të cilëve rezultojnë 193 raste pozitive.

Brenda 24 orëve janë raportuar 8 raste të vdekjes me SARS CoV-2 pozitiv.

Ndërkohë që drejtori i IKSHPK-së, Naser Ramadani, dje u shpreh optimist, duke thënë se rastet me Covid-19 po bien, ndërsa qytetarët po respektojnë masat qeveritare dhe rekomandimet shëndetësore. /Albinfo.ch