Afro 40 mijë infektime në Zvicër që nga fillimi i pandemisë

Të dhënat e fundit në Zvicër rreth numrit të të prekurve nga koronavirusi

Statistikat e fundit tregojnë se në Zvicër që nga fillimi i pandemisë e deri tani ka gjithsej 39,332 infeksione me koronavirus, shkruan albinfo.ch.

Nga numri total i të prekurve, në Zvicër janë shënuar rreth 1.716 viktima shkaku i pandemisë.

Autoritetet shëndetësore zvicerane kanë bërë të ditur se Zvicra ka rritje të dukshme të infeksioneve, vetëm në javën e fundit që e lamë pas, raportimi i infeksioneve të reja SARS-CoV-2 të regjistruara në Zvicër ishte mbi 1 mijë, 40% më shumë se korriku. Ndërkohë, sot numri i të prekurve është 306 persona.

Vlen të theksohet se që prej fillimit të qershorit 2020, kantonet me shkallë më të lartë të infeksionit për frymë kanë qenë: Gjeneva, Jura, Valais, Fribourg, Zug, Vaud, Cyrih, Schwyz, Uri dhe Aargau, sipas korona-data.ch. Gjeneva dhe Jura kanë udhëhequr listën me normat më të larta të infeksionit në Zvicër që nga 1 qershori i vitit 2020.

Sidoqoftë, përkundër të prekurve, të dhënat e fundit tregojnë se numri i të shëruarve në Zvicër është rritur dukshëm në këto ditët e fundit. Gjatë kësaj jave në Zvicër janë raportuar se numri i shërimeve ka arritur në 33.900 persona.

Duke qenë se shifra zyrtare, bazuar në numrin e personave që janë testuar, që në fillim ishin pozitivë në testin e bërë, dhe më pas janë rikuperuar, është ngritur, këtë e tregon edhe “Worldometers”, e cila publikon në kohë reale të dhëna nga koronavirusi, shkruan albinfo.ch.

---