12 viktima dhe 641 raste të reja në 24 orët e fundit në Maqedoninë Veriore

KEYSTONE/EPA/GEORGI LICOVSKI

Është bërë e ditur se në 24 orët e fundit shënuan një kapërcim të frikshëm të shifrave të pandemisë në Maqedoninë e Veriut. Vendi fqinj shënoi 12 të vdekur e 641 raste të reja, të dhëna këto alarmuese që dëshmojnë qartë se vala e dytë e sëmundjes po jep me forcë efektet e saj, përcjell albifo.ch.

Bilanci shqetësues vjen në kohën kur në vend hynë në fuqi masat e reja kufizuese për mbrojtjen nga koronavirusi, e që kryesisht kanë të bëjnë me transportin publik, restorantet dhe administratën publike.

Vendimi i qeverisë parashikon që të gjitha lokalet dhe restorantet të punojnë deri në orën 23:00, transporti publik ta reduktojë në 50 për qind kapacitetin e pasagjerëve, ndërsa institucionet shtetërore dhe publike ta organizojnë punën e të punësuarve me turne, rotacion apo edhe punë nga shtëpia. Qeveria la në fuqi edhe masën për mbajtjen e aktiviteteve sportive pa praninë e shikuesve.

Ndërkohë, nuk ka ende marrëveshje mes partive për masat e tjera që kanë të bëjnë me mbajtjen e maskës në ambiente të hapura, ndalimin e grumbullimit të më shumë se katër personave pas orës 22:00, si dhe ndalimin e vizitave të më shumë personave nëpër familje. Këto masa nuk mund të miratohen pa mbështjen e opozitës, meqë shumica parlamentare nuk i ka votat e mjaftueshme. /Albinfo.ch