Reagim i Këshillit të Shoqatave Shqiptare ndaj sulmit terrorist në Vjenë

Këshilli Koordinues i Shoqatave Shqiptare në Austri dënon aktin terrorist në Vjenë.

Këshilli Koordinues i Shoqatave Shqiptare në Austri (KKShShA) dënon aktin terrorist të ndodhur ditën e hënë në Vjenë, kryeqytetin botëror të paqes, tolerancës dhe bashkëjetesës, në të cilin pati dhe viktima të pafajshme dhe disa të plagosur.

“Në këto ditë dramatike për Austrinë solidarizohemi me popullin dhe shtetin austriak dhe ritheksojmë se multikulturaliteti është një nga themelet kryesore të së sotmes dhe të nesërmes sonë të përbashkët. Larmia, harmonia, respekti i ndërsjellët, integrimi dhe pjesëmarrja aktive në shoqëri do të jenë gjithmonë shtylla në të cilat do të bazojmë të ardhmen tonë.

Në të njëjtën kohë KKShShA-ja shpreh ngushëllimet më të thella familjeve të personave që humbën jetën nga një akt të tmerrshëm e barbar.

 “Duke sulmuar Vjenën, terroristët provuan që të godasin vlerat universale të qytetërimit: lirinë, të drejat e njeriut, demokracinë, pluralizmin, barazinë, etj.”, thuhet në reagim.

“Terroristët nuk përfaqësojnë asnjë grup etnik. Ata janë simbol i së keqes, urrejtjes, përçarjes dhe dhunës. Këtë herë mbase ia arritën të na lëndojnë, por jo dhe të na gjunjëzojnë. Për më tepër, mbeshtetja për Vjenën vie nga të katër anët e globit, dhe kjo na bën edhe më të fortë dhe më të përkushtuar për të mbrojtur diversitetin që na karakterizon dhe i cili është pjesë e pandashme e qenies dhe jetës sonë”, përcjell Albinfo Austria.

Me këtë rast ju ftojmë që në ditët në vijim të ndezim qirinj në vendin ku ndodhi krimi dhe në këtë mënyrë të përkujtojmë të gjithë ata burra dhe gra të pafajshme që me jetën e tyre paguan çmimin e dashurisë së tyre për këtë qytet dhe banorët (njerëzit e saj) e saj.

Qoftë i paharruar kujtimi për ta!

Sot të gjithë ne jemi vjenezë!

Rroftë Austria!

Kaltrina Durmishi

Kryetare e Këshillit Koordinues të Shoqatave Shqiptare në Austri

Vjenë, 4 nëntor 2020

 

 

 

 

---