Forumi i Davosit 2021 “ik” nga Zvicra, mbahet në Singapor

"Marrë parasysh situatën me COVID-19 në Evropë, nuk ka mundësi të garantojmë shëndetin dhe sigurinë e punonjësve tanë, pjesëmarrësve dhe publikut të gjerë"

Tani është e qartë: Forumi Ekonomik Botëror, WEF, i njohur më shumë si “Forumi i Davosit” nuk do të zhvillohet në Zvicër vitin e ardhshëm.

“Ne kishim planifikuar të organizonim konferencën tonë vjetore në vitin 2021 në Bürgenstock. Fatkeqësisht, duke pasur parasysh situatën aktuale të COVID-19 në Evropë, nuk ka mundësi të garantojmë shëndetin dhe sigurinë e punonjësve tanë, pjesëmarrësve dhe publikut më të gjerë”, shkruan Børge Brende, President i WEF, në një e- Mail, i cituar nga agjencia e lajmeve Reuters.

“Singapori ishte i suksesshëm në trajtimin e pandemisë” vazhdon Brende në letrën e tij. Ai më tutje premton se një njoftim më i gjerë për shtyp do të dërgohet të martën.

Qëllimi i Forumit Ekonomik Botëror ka qenë gjithmonë qëndrimi i tij në Zvicër, përcjell albinfo.ch. Megjithëse ishte e qartë që nga fillimi se kjo nuk mund të garantohej  100 për qind për shkak të situatës me Covid 19.

Ndryshimi i vendndodhjes pasqyron përparësinë që forumi i jep mbrojtjes së shëndetit dhe sigurisë së pjesëmarrësve dhe të nikoqirëve.

Sesioni special i vitit 2021 në Singapor do të jetë aktiviteti i parë i udhëheqjes globale kushtuar rimëkëmbjes globale nga pandemia, shkruajnë organizatorët.

---