Ushtria e Kosovës në misione ndërkombëtare

Nuk ka pasur asnjë votë kundër dhe asnjë abstenim të deputetëve për këtë propozim

Kuvendi i Kosovës ka votuar këtë të martë propozimin e Qeverisë për dërgimin e trupave të FSK-së në mision jashtë vendit.

92 deputetë kosovarë kanë votuar pro dërgimit të ushtarëve të Ushtrisë së Kosovës për mision të përbashkët me ushtrinë e Iowa-s së SHBA-së, shkruajnë mediat vendore, përcjell albinfo.ch.

Nuk ka pasur asnjë votë kundër dhe asnjë abstenim të deputetëve për këtë propozim, përcjell albinfo.ch.

Kryetarja e Kuvendit të Kosovës, Vjosa Osmani, ka thënë se miratimi i propozimit për dërgimin e trupave të FSK-së në misione të jashtë ushtarake është i natyrës historike për Kosovën.

“Është krenari e dyfishtë, me djemtë dhe vajzat e FSK-së që janë këtu si rezultat i përpjekjeve të brezave të tërë dhe është e arritur sepse kjo po bëhet bashkë me SHBA-në”.

“Jam e lumtur që si kuvend po e përmbyllim këtë legjislaturë me një vendim të tillë. Jam e bindur se ky është vetëm fillimi i sukseseve të ushtrisë sonë”.

Kryetari i Skenderajt, Bekim Jashari, ka reaguar pas votimit në Kuvend të vendimit që FSK të shkojë në misione paqeruajtëse bashkë me ushtrinë amerikane.

Me anë të një postimi në Facebook, Jashari është shprehur shumë i lumtur për këtë vendim, duke thënë se kjo është e aritur e djemve dhe vajzave të FSK-së si dhe synim i arritur me sukses.

“Kjo është një e arritur e radhës e ushtrisë sonë, djemve dhe vajzave të FSK-së, një synim i arritur me sukses, që edhe ne si popull që më së miri ia dijmë vlerën paqes dhe lirisë, përmes FSK-së të kontribuojmë në ruajtjen e paqës në botë”, ka shkruar Jashari.

---