COVID-19: Çerdhet duan qasje prioritare në testime dhe vaksina

Ndryshe nga bllokimi i parë, çerdhet kanë mbetur të hapura në Angli dhe Uells, por janë mbyllur në Skoci dhe Irlandën e Veriut.

Drejtuesit e tyre po kërkojnë qasje në teste dhe vaksina nëse çerdhet do të qëndrojnë të hapura. Stafi në sektor thotë se janë të frikësuar se vendet e tyre të punës nuk janë të sigurta.

Peticionet online janë ngritur, duke bërë thirrje që çerdhet të mbyllen nëse nuk jepet mbështetje shtesë.

Në bllokimin e parë qeveria mbylli të gjitha çerdhet, por këtë herë ato janë hapur në Angli dhe Uells. Ministrat këmbëngulin se rreziqet janë të ulëta, me çerdhet që ofrojnë mbështetje thelbësore për prindërit që punojnë.  Por, pronarja e çerdheve, Alex Quist, thotë se ajo ndihet “e harruar” dhe do të preferonte të mbyllej sesa të qëndronte e hapur.

“E pamundur të distancosh shoqërinë me këtë moshë. Ata kanë nevojë për përqafime, kontakte të ngushta”, tha ajo.

Ashtu si shumë drejtues të tjerë të çerdheve, ajo nuk është e bindur që kushtet janë të sigurta dhe mendon se çerdhet shpesh anashkalohen, ndryshe nga shkollat ​​dhe kolegjet.

Në një deklaratë, një zëdhënës i Departamentit të Shëndetësisë tha: “Çerdhet mbeten mjedise me rrezik të ulët për fëmijët dhe stafin dhe nuk ka asnjë provë që varianti i ri i koronavirusit prek në mënyrë disproporcionale fëmijët e vegjël. Mbajtja hapur e çerdheve do të mbështesë prindërit dhe do të japë kujdesin dhe edukimin thelbësor për fëmijët më të vegjël”, shkruan “SkyNews”, përcjell albinfo.ch.