Revista gjermane shpall Robin Krasniqin “Boksier të vitit 2020”

"Krasniqi i prishi kështu Bösel-it rastin e parë për të mbrojtur titullin botëror dhe përmbushi ëndrrën e tij të kahmotshme për t'u bërë kampion bote"

Boksieri profesionist me banim në Mynih Robin  (Haxhi) Krasniqi, falë suksesit që arriti vitin e kaluar nuk është vetëm i përzgjedhuri i sportdashësve shqiptarë.

Atë, së fundi e ka shpallur “Boksider të Vitit” në Gjermani, revista e atjeshme e boksit “Boxen.1”.

Ja si e prezanton sportistin shembullor shqiptaro-gjerman revista e përmendur.

Robin Krasniqi (51-6 (1), është “Boksieri i Vitit 2020”! Përveç 33-vjeçarit nga Mynihu, ishte nominuar edhe Jack Culcay, i cili mbeti për pak prapa Krasniqit, transmeton albinfo.ch.

Krasniqi u ngjit dy herë në ring vitin e kaluar dhe të dy herët ia doli të fitonte në kohë të shkurtë. Pasi që mundi Stanislav Eschner me TKO në raundin 6, në muajin gusht, ai përgatiti një surprizë të madhe më 10 tetor 2020, kur po ashtu përmbushi ëndrrën e tij jetësore.

Ai ishte “kundërshtar zëvendësues”, sepse sfiduesi i planifikuar fillimisht i Dominic Bösel-it (ish kampionit), Zac Dunn, nuk mundi të udhëtonte në Gjermani për shkak të pandemisë së koronës. Por Robin Krasniqi me fitoren e tij siguroi që “Sensacioni i Kupës së Botës 2020” të mbetej në tokën gjermane, përcjell albinfo.ch.

Në luftën për titujt e kampionit botëror IBO dhe WBA (të përkohshëm) në kategorinë e peshës gjysmë të rëndë, Krasniqi i lindur në Kosovë, ka nokautuar kolegun e tij të fortë, që në raundin e tretë.

Krasniqi i prishi kështu Bösel-it rastin e parë për të mbrojtur titullin botëror dhe përmbushi ëndrrën e tij të kahmotshme për t’u bërë kampion bote.

---