Refuzohet kërkesa e Thaçit dhe të tjerëve për lirim të përkohshëm nga Gjykata Speciale

Në njoftimin e fundit nga gjykatësi i procedurës paraprake i Dhomave të Specializuara të Hagës, Nicolas Guillou, thuhet se e ka refuzuar kërkesën e ish-presidentit të Kosovës, Hashim Thaçi, ish-deputetit Rexhep Selimi dhe ish-kryeparlamentarit Jakup Krasniqi për lirim të përkohshëm, përcjell albinfo.ch.

Në njoftimin e lëshuar nga Dhomat e Specializuara të Kosovës refuzimi i kërkesës për lirimin e përkohshëm të Thaçit arsyetohet me Nenin 41(6)(b) të ligjit.

Ndër të tjera, ky nen përfshin rrezikun nga arratisja, rrezikun nga shkatërrimi, fshehja, ndryshimi ose falsifikimi i provave, si dhe rrezikun e përsëritjes së veprës penale.

Vendimi për vazhdimin e paraburgimit është bërë publik ditë më parë, ndërsa të mërkurën është publikuar në faqen zyrtare të Dhomave të Specializuara të Kosovës edhe vendimi për Hashim Thaçin, Rexhep Selimin e Jakup Krasniqin.

Ditë më parë është refuzuar edhe kërkesa e Kadri Veselit për lirim të përkohshëm.