OBSH rekomandon vaksinën “AstraZeneca” edhe në rastet e varianteve të COVID-19

Keystone

Vaksina e prodhuar nga “AstraZeneca” mund të përdoret gjithashtu në vendet ku ka variante të COVID-19, rekomanduan 15 ekspertët e OBSH-së të specializuar në imunizime.

“Vaksina “AstraZeneca” mund të përdoret edhe në vendet ku janë të pranishme variante të koronavirusit të ri”, shpjegohet në raportin e tyre.

Udhëzimet e OBSH-së vijnë pak ditë pas botimit të një studimi, që tregon se vaksina ofron më pak mbrojtje ndaj variantit 501Y.V2 të COVID-19, që u zbulua për herë të parë në Afrikën e Jugut, raporton Ansa, përcjell Albinfo.ch.

Organizata e KB-së vuri në dukje se rezultatet e këtij studimit treguan vetëm efikasitet të kufizuar kundër formave të lehta të COVID-19, por që nuk kishte prova se vaksina nuk mbron nga format e rënda.

Prandaj OBSH rekomandoi përdorimin e produktit edhe nëse variante të koronavirusit janë të pranishme në një vend.

Megjithatë, ajo shtoi se ekziston një nevojë urgjente për një qasje të koordinuar për mbikëqyrjen dhe vlerësimin e varianteve dhe ndikimin e tyre të mundshëm në efikasitetin e vaksinës.