Fauci fiton çmimin prestigjioz izraelit për kontributin gjatë pandemisë globale

Anthony Fauci, specialisti kryesor amerikan për Sëmundjet Infektive, u emërua sot fitues i një çmimi prestigjioz akademik izraelit për punën e tij gjatë krizës së koronavirusit, ndër të tjera.

“Çmimi “Dan David” iu dha dr.Faucit në fushën e Shëndetit Publik”, tha fondacioni në një njoftim për shtyp, trasmeton Dpa, përcjell Albinfo.ch.

Çmimi jepet çdo vit në tri kategori: e kaluara, e tashmja dhe e ardhmja, secila me vlerë një milion dollarë.

Fauci fitoi në kategorinë “e tashmja”.

Në njoftimin e tyre, komiteti i Çmimit e vlerësoi Faucin për kontributin e tij të jashtëzakonshëm në kërkimin e HIV dhe shpëtimin e miliona jetëve në botën në zhvillim.

Ai, gjithashtu, vlerësoi udhëheqjen e tij në krye të Institutit Kombëtar të Alergjisë dhe Sëmundjeve Infektive dhe në veçanti luftën për njohjen e qasjeve të reja siç janë vaksinat e ARN-së, që tani u jepen miliona njerëzve në të gjithë botën, si edhe për mbrojtjen me guxim të shkencës përballë një kundërshtimi të painformuar gjatë krizës sfiduese të COVID-19.

Kandidatët e Çmimit “Dan David” dhurojnë 10 % të parave të tyre të shpërblimit për bursa për studiues të diplomuar ose pasuniversitarë në fushat e tyre përkatëse.