Këto kushte duhet të plotësohen për zbutjen e bllokimit në Zvicër

Dy nga kushtet për hapje janë plotësuar dhe dy të tjera, ende jo. Lexoni cilat janë ato

Më 19 mars, Qeveria Federale e Zvicrës pritet të vendosë për hapin e radhës të zbutjes së masave të pandemisë, që pritet më 22 mars. Por cilat janë kushtet që duhet të plotësohen për të ndërmarrë këtë hap?

Në vazhdim, albinfo.ch sjell një permbledhje të këtyre kushteve.

1. Incidenca 14-ditore aktualisht është 177.11. Sipas udhëzimeve, kjo, më 17 mars duhet të jetë nën incidencën 14-ditore të 1 marsit, ose (165.95). Kjo pikë aktualisht nuk plotëson kushtin për hapje.
2. Përqindja e testeve pozitive në 14 ditët e fundit është 4.86 për qind. Në këtë pikë, kushti i vendosur (5%), plotësohet.
3.  Në Zvicër aktualisht janë 171 pacientë me Covid-19 në njësitë e kujdesit intensiv, transmeton albinfo.ch. Edhe kjo pikë rezulton e përmbushur pasi që vlera udhëzuese ishte që të ketë 250 të shtruar në njësitë e kujdesit intensiv.
4. Mesatarja e vlerave të reproduksionit (R) të shtatë ditëve të fundit është 1.07. Kushti sa i takon kësaj pike është që kjo vlerë të bjerë në 1. Rrjedhimisht, as ky kusht për hapje nuk është i plotësuar.

Siç shihet nga parashtrimi më lartë, dy nga kushtet për hapje janë plotësuar dhe dy të tjera, ende jo.

---