Vaksinimi i mësuesve në Shqipëri, 12 refuzojnë

Disa për frikën dhe pasigurinë ndaj vaksinës “AstraZeneca”, disa për sëmundje shoqëruese

Vaksinimi i mësuesve ka nisur në gjithë Shqipërinë, por me ritme të ndryshme. 36 mësues të shkollës “24 Maji” janë paraqitur sot në ditën e parë të vaksinimit në Vlorë, nga të cilët 22 kanë kryer vaksinimin, kurse të tjerët e kanë refuzuar.

Disa për frikën dhe pasigurinë ndaj vaksinës “AstraZeneca”, disa për sëmundje shoqëruese, janë shprehur mësuesit jashtë kamerave. Ndërsa, nga ana tjetër, mësuesit që e kryen vaksinimin shprehen të sigurt për efikasitetin.

Pas refuzimit të disa mësuesve, shefi i epidemiologjisë pranë Drejtorisë Rajonale të Shëndetit Publik, Agron Bashllari, u shpreh se ndonëse vaksina nuk është me detyrim, ajo është e domosdoshme, shkruan Euronews.al.

“Është një proces që do të zhvillohet me shpejtësi, do të vaksinohen mësuesit e shkollave, kopshteve, çerdheve, gati 1800 mësues. Sa i përket refuzimit të mësuesve, ne përpiqemi t’i informojmë, por është zgjedhje e individit, në vijojmë punën duke menduar që kemi mijëra njerëz që duan të vaksinohen”, deklaron Bashllari.

Procesi i vaksinimit të mësuesve ka nisur edhe në qytetin e Pogradecit, fillimisht në dy shkolla 9-vjeçare të qytetit, përcjell albinfo.ch.

Në total në rrethin e Pogradecit janë rreth 1200 vaksina që do të aplikohen në mësuesit e sistemit parashkollor, 9-vjeçar dhe të mesëm bashkë me stafet mbështetëse.

Po ashtu procesi i vaksinimit të mësuesve ka nisur edhe në Bilisht, ku do të vaksinohen 250 mësues, ndërsa po sot ka nisur edhe vaksinimi i të moshuarve në qytetin e Korçës.

---