Shumica e zviceranëve duan hapjen e restoranteve në fund të marsit

53 për qind do të dëshironin që restorantet të hapin madje edhe hapësirat e tyre të brendshme, që në fund të marsit

Për herë të shtatë, popullata zvicerane është anketuar në lidhje me aspektet më të rëndësishme të krizës së koronës, e cila tashmë ka hyrë në vitin e dytë të saj.

Ky anketim është bërë si pjesë e “SRG Corona Monitor”, shkruan watson.ch.

49,909 njerëz nga të gjitha pjesët e Zvicrës kanë marrë pjesë në sondazhin në internet të SRG midis 9 dhe 15 marsit 2021 – numër ky më i madh se në çdo valë të mëparshme të sondazheve, transmeton albinfo.ch.

Për shkak të peshimit statistikor, rezultatet e kësaj serie studimi përfaqësojnë popullsinë rezidente të integruar gjuhësisht në Zvicër, të moshës 15 vjeç e tutje.

Këshilli Federal do të diskutojë të premten (nesër, më 19 mars) hapat e mëtejshëm të zbutjes së masave, përcjell albinfo.ch. Një shumicë e konsiderueshme e popullatës zvicerane do të dëshironte që hapja të bëhet sa më shpejt.

53 për qind do të dëshironin që restorantet të hapin madje edhe hapësirat e tyre të brendshme, që në fund të marsit.

Ndërkaq duket edhe më e qartë kjo preferencë sa u takon tarracave të restoranteve: 66 për qind do të donin që këto të hapen në fund të marsit.

Nga ana tjetër, detyrimi i punës nga shtëpia (Home Office) ka shumë mbështetje, transmeton albinfo.ch. Vetëm një pakicë do të donte që ky detyrim të hiqet në këtë muaj.

 

---