Largohet nga rrjetet sociale deputetja që aderoi nga PDK-ja në Vetëvendosje

Deputetja Adelina Grainca tashmë ka mbyllur llogarinë e saj në Facebook. Befasia më e madhe në seancën ku u votua Vjosa Osmani presidente ishte aderimi i deputetes të PDK-së, Adelina Grainca, në Lëvizjen Vetëvendosje. E pasi u konfirmua aderimi, profili i Adelina Graincas në Facebook është “bombarduar” me sharje e ofendime nga votues të PDK-së dhe duket se kjo ka qenë pikërisht arsyeja pse kjo e fundit vendosi ta mbyllë profilin e saj.

“Shpi n’Marigon a? Turp e haram vota ime”, “E tradhtove votën time”, “Na turpërove”, ishin disa nga postimet që u bënë në profilin e deputetes Grainca, e cila kandidoi për herë të parë për deputete në zgjedhjet e 14 shkurtit dhe arriti të sigurojë votat e mjaftueshme. Ajo ishte pjesë e listës së PDK-së.