Në Tiçino janë injektuar 33 vaksina me afat të skaduar

Afati i 33 dozave të vaksinës kishte skaduar më pak se dy ditë më parë, thonë në departamentin e Shëndetit dhe Çështjeve Sociale të Kantonit Ticino

33 doza të vaksinës Moderna që tashmë u kishte skaduar afati, janë injektuar në një qendër vaksinimi në  Bellinzona. Kantoni i Ticinos ka njoftuar me këtë rast se nuk ka rrezik shëndetësor për njerëzit e prekur, raporton sda.ch.

Por, dëmi mund të qëndrojë në faktin se ato vaksina mund të mos kenë ushtruar efektin e pritur .

Afati i 33 dozave të vaksinës kishte skaduar më pak se dy ditë më parë, thonë në departamentin e Shëndetit dhe Çështjeve Sociale të Kantonit Ticino, transmeton albinfo.ch.

Për më tepër, nuk bëhet fjalë për një datë skadence si të tillë, por një datë që kufizon ruajtjen e produktit pas shkrirjes. Dozat e vaksinimit nga Moderna mund të ruhen në dy deri në tetë gradë Celsius për 30 ditë pas shkrirjes.

Për fat të keq, nuk mund të përjashtohet që mbajtja e dozave të vaksinës në fjalë për një kohë të gjatë mund të zvogëlojë efektivitetin e tyre, shkruan Departamenti i Shëndetit dhe Çështjeve Sociale. Prandaj, autoriteti u ofron njerëzve të prekur që t’i nënshtrohen një testi gjaku. Kjo mund të përdoret pastaj për të kontrolluar përgjigjen imune.

Dozat e vaksinave që ishin ruajtur për shumë kohë, janë dhënë në një qendër të projektit “Vaksinimi në afërsi”, përcjell albinfo.ch. Qëllimi i qendrave të vaksinimit të improvizuara në fillim të vitit ishte që tu mundësohet njerëzve të moshuar dhe jo mjaft të lëvizshëm të vaksinohen pa pasur nevojë të udhëtojnë në ndonjë nga qendrat kantonale të vaksinimit.

Zyra e farmacistit kantonal të Ticino po heton shkakun e gabimit, shkruan në përfundim Departamenti i Shëndetit dhe Çështjeve Sociale.

---