Zvicër: Varianti britanik, 50 për qind më vdekjeprurës se ai i vjetri

Nëse në valën e parë 15 për qind e të shtruarve në spitale transferoheshin në njësitë e kujdesit intensiv, tani janë 30 për qind

Gjithnjë e më shumë pacientë me Covid duhet të trajtohen në njësitë e kujdesit intensiv për shkak të variantit të ri, britanik të virusit. Për këtë arsye, stafi shëndetësor është nën stres të vazhdueshëm. Kështu ka thënë Urs Karrer, zëvendës kryetar i Task Forcës Shkencore Federale Covid-19, sot, para mediave në Bernë.

Varianti britanik i virusit ka rreth 50 për qind më shumë gjasa të shkaktojë vdekje sesa varianti i virusit që mbizotëronte më parë, transmeton albinfo.ch.  Gjithnjë e më shumë njerëz të shtruar në spitale po duhet të trajtohen në njësitë e kujdesit intensiv.

Kështu, ai ka thënë se nëse në valën e parë 15 për qind e të shtruarve në spitale duhej të transferoheshin në njësitë e kujdesit intensiv, tani janë 30 për qind. Me variantin e ri të virusit, 50 deri në 60 vjeçarët gjithashtu janë shndërruar në grup rreziku. Shumë njerëz të sëmurë rëndë janë të moshave në mes 40 dhe 50 vjeç.

Stafi mjekësor në stres të vazhdueshëm

Stresi në stafin në njësitë e kujdesit intensiv është  mjaft i lartë, ka thënë eksperti më tutje. Si ilustrim, ka shtuar ai, edhe operacione rëndësishme si heqja e tumorit duhet të shtyhen, transmeton albinfo.ch. Dhe sapo po zbutet situata në frontin e Covid-19, duhet të kompensohet numri i prapambetur i operacioneve, ka thënë Karrer. Kjo i mban punëtorët shëndetësorë nën stres të vazhdueshëm.

---