Ekspertët raportojnë: Rënie e pandemisë së koronavirusit në Zvicër

Më shumë se 20 për qind e popullsisë së Zvicrës janë vaksinuar plotësisht

Të gjithë treguesit dëshmojnë një rënie të pandemisë së koronavirusit në Zvicër, sipas një raporti nga grupi shkencor i punës i Zvicrës Covid-19, transmeton albinfo.ch.

Shkalla mesatare R e shtatë ditëve, e cila tregon se sa shpejt përhapet virusi përmes një komuniteti, qëndron në 0.85 – shumë poshtë pragut të 1, shkruajnë mediat zvicerane.

Në të njëjtën kohë, numri i rasteve të konfirmuara ka rënë me 31 për qind në javë, shtrimet në spital ranë me 22 për qind dhe vdekjet me 16 për qind.

Në të gjitha grupmoshat vërehet gjithashtu një rënie statistikisht e rëndësishme e numrit të infeksioneve.

Zyrtarët shëndetësorë gjithashtu raportojnë se që nga 1 qershori, më shumë se 20 për qind e popullsisë së Zvicrës janë vaksinuar plotësisht. /Albinfo.ch

---