Ja çfarë u bisedua mes Kurtit dhe kancelarit të Austrisë, Sebastian Kurz

Kurti pati edhe një takim tjetër me kancelarin e Austrisë, Sebastian Kurz.

Kryeministri i Kosovës, Albin Kurti, dje ka marrë pjesë në Samitin e gjashtë shteteve të Ballkanit Perëndimor, i cili është mbajtur në Vjenë nën organizimin e kryeministrit austriak, Sebastian Kurz, transmeton albinfo.ch.

Në këtë takim Kurti ka thënë se Kosova dhe Serbia duhet të bëjnë një deklaratë të përbashkët të paqes me zotim për mossulmim, Serbia ta njohë pavarësinë e Kosovës dhe të ballafaqohet me të kaluarën, si dhe Kosova e Serbia të zbatojnë reciprocitetin sa u përket të drejtave të pakicave.

Pas përfundimit të samitit, Kurti pati edhe një takim tjetër me kancelarin e Austrisë, Sebastian Kurz.

“Pas samitit të Vjenës për Ballkanin Perëndimor, më priti në takim Kancelari i Austrisë, z. Sebastian Kurz, në zyrën e tij. Fillimisht e falënderova Kancelarin Kurz për përkrahjen dhe ndihmën e vazhdueshme të Austrisë për vendin tonë, qysh prej pranimit të studentëve dhe diplomave në vitet e ‘90-ta deri te mbështetja në menaxhimin e pandemisë Covid-19. Biseduam për marrëdhëniet shumë të mira bilaterale ndërmjet dy republikave tona, raportet në rajon dhe integrimet evropiane. Në veçanti shqyrtuam mundësitë e rritjes së bashkëpunimit ekonomik dhe shkëmbimit tregtar, nevojën e Kosovës për investitorë nga Austria, si dhe rolin që mund të luajë mërgata jonë në shtimin e urave midis dy shteteve dhe popujve tanë. Në fillim të vitit të ardhshëm do të kemi një samit të përbashkët biznesi Kosovë-Austri” ka shkruar Kurti në një postim në rrejtet sociale. /Albinfo.ch

---