SHBA: Aksident mes 18 veturave, humbin jetën 9 fëmijë dhe një i rritur

Pixabay - Aksident - Alexas_Fotos

Mësohet se një ngjarje e rëndë është shënuar në SHBA, ku nëntë fëmijë dhe një i rritur humbën jetën në një aksident tragjik të ndodhur në shtetin e Alabamas, përcjell albinfo.ch,

Thuhet se në këtë aksident u përfshinë 18 automjete për shkak të motit të keq dhe shirave të rrëmbyeshëm. Zona është përfshirë nga një stuhi tropikale, që ka shkatërruar dhjetëra shtëpi.

Autoritetet njoftuan se fëmijët që humbën jetën tragjikisht në aksident janë nga moshat 9 muajsh e deri në 17 vjeç.

Foshnja 9 muajshe vdiq në një automjet së bashku me të atin, shkruajnë mediat e huaja.

Tetë viktimat e tjera ishin në një automjet që i përkiste një shtëpie strehimi për vajzat e braktisura, të lëna pas dore, ose të abuzuara. Më e vogla mes viktimave në këtë automjet ishte katër vjeçe.

Pesë persona të tjerë u lënduan gjatë përplasjes, por asnjë nuk ndodhet në gjendje kritike për jetën, shkruajnë më tej mediat e huaja. /tch