Shoferi që shkaktoi vetaksidentin dërgohet në Prokurori

Vozitësi, sipas mediave kroate, është dërguar në paraburgim, ndërsa nesër në orën 9 të mëngjesit do të sillet në seancë, ku do të vendoset për masën e paraburgimit

Shoferi, i cili shkaktoi vetaksidentin mëngjesin e së dielës në Slavonski Brod të Kroacisë, është dërguar sot para Prokurorisë së Qarkut.

Ai është sjellë në gjykatë i prangosur dhe i shoqëruar nga dy policë, derisa është parë se ka disa pika gjaku në këmishën që mbante veshur.

Zëvendësi i Avokatit të Shtetit të Qarkut, Franjo Kopuniq, ka thënë se i dyshuari është mbrojtur në heshtje. “Ai është mbrojtur në heshtje. Ndërsa mbrojtësi i është ofruar sipas detyrës zyrtare”, ka thënë Kopuniq, përcjell Albinfo.ch.

Shoferi i dyshuar akuzohet për veprën penale ‘’Shkaktimi i aksidentit të trafikut në rrugë’’. Dënimi maksimal për këtë vepër me ligjet e Kroacisë është nga gjashtë muaj deri në 15 vjet.

Siç u raportua, shoferin e zuri gjumi për një moment dhe autobusi që po bartte mërgimtarë nga Kosova devijoi nga rruga, duke lënë të vdekur 10 persona dhe mbi 40 të lënduar.

 

---