Situatë alarmante me zjarret në Rugovë

Bëhet e ditur se zjarri ka përfshirë rajonin e Bjeshkëve të Rugovës dhe si pasojë e temperaturave të larta nuk po arrihet të mbahet nën kontroll. FSK ka evakuuar banorët nga zonat, ku zjarri ka arritur shumë afër shtëpive të banimit dhe po rrezikon jetën, përcjell albinfo.ch.

Banorët e kësaj treve kanë treguar për ‘Radio 1’ se, Ushtria e Kosovës së bashku me Policinë e Kosovës dhe me pjesëtarët amerikanë të KFOR-it kanë larguar banorët e disa pjesëve të Rugovës, ku zjarri u është afruar shumë shtëpive të banimit.

Ata janë nisur drejt qytetit të Pejës. Vatra të zjarrit janë hapur në zonën e Rugovës, ndërsa sipas banorëve atje, këtë herë flakët janë në afërsi të shtëpive.

Ndërkohë kryetari i Pejës, Gazmend Muhaxheri, ka bërë thirrje që vetëm personat zyrtarë të vizitojnë zonat ku zjarri nuk ka mundur të vihet nën kontroll.