1000 veta protestojnë kundër gjyqtares që i ka ulur dënimin përdhunuesit

Ky vendim ka dërguar një mesazh që nuk është në frymën e kohës dhe është i pakuptueshëm, thonë protestuesit

Më shumë se 1.000 njerëz kanë demonstruar të dielën pasdite para Gjykatës së Apelit në Bazel kundër vendimit të saj  mbi një rast përdhunimi, shkruan srf.ch

Javën e kaluar, Gjykata e Apelit në Bazel i ka ulur dënimin një 33-vjeçari në një seancë apeli, transmeton albinfo.ch. Ai kishte përdhunuar një grua në fund të vitit 2020.

Sipas aktgjykimit të gjykatës në fjalë dënimi në shkallën e parë ishte shumë i lartë sepse sulmi ishte “relativisht i shkurtër” dhe gruaja nuk kishte pësuar asnjë dëmtim fizik me atë rast.

Për më tepër, sipas kryetares së trupit gjykues, gruaja “kishte dërguar sinjale” sepse më parë kishte qenë me një burrë tjetër në tualetin e një klubi ku ishin puthur.

Ky vendim ka dërguar një mesazh që nuk është në frymën e kohës dhe është i pakuptueshëm, thonë protestuesit.

Ky gjykim ka qenë subjekt i debatit të nxehtë në Zvicër prej disa  ditësh.

Aktivistët për të drejtat e grave po bëjnë thirrje për një ndryshim në ligj. “Një jo është një jo”, pavarësisht se si është sjellë gruaja  paraprakisht, thonë aktivistët në fjalë dhe ky slogan mund të lexohej në pankartat e demonstratës së sotme në Bazel.

Vetëm një pjesë e viktimave raportojnë akte të tilla sepse kanë frikë se do të jenë të paragjykuara nga gjyqësori, thonë aktivistët.

---