Zbulohet rastësisht një ishull i ri në Arktik

Studiuesit thonë se kanë zbuluar rastësisht atë që ata besojnë se është ishulli më verior në botë i vendosur në brigjet e Grenlandës

Shkencëtarët nga Universiteti i Kopenhagenit fillimisht menduan se kishin mbërritur në Oodaaq, një ishull i zbuluar nga një ekip sondazhi danez më 1978, për të mbledhur mostra gjatë një ekspedite që u krye në korrik. Përkundrazi, ata përfunduan në një ishull të pazbuluar më në veri.

“Ne ishim të bindur se ishulli ku po qëndronim ishte Oodaaq, i cili deri atëherë ishte regjistruar si ishulli më verior në botë”, tha udhëheqësi i ekspeditës, Morten Rasch, nga Departamenti i Gjeoshkencave dhe Menaxhimit të Burimeve Natyrore të universitetit.

“Por kur postova fotografi të ishullit dhe koordinatat e tij në mediat sociale, një numër studiuesish amerikanë të ishujve u çmendën dhe thanë se nuk mund të jetë e vërtetë”, shtoi ai në një deklaratë të premten.

Ishulli ende i paidentifikuar është 780 metra në veri të Oodaaq, një ishull pranë Cape Morris Jesup, pika më veriore e Grenlandës.

---