Osmani fton investitorët zviceranë për të investuar në Kosovë

Interesimi i bizneseve e investitorëve për Kosovën, sipas Osmanit, u vërejt shumë qartë

Përpara rreth 1500 përfaqësuesve të komunitetit të biznesit, akademikëve, politikanëve e përfaqësuesve të mediave zvicerane, presidentja e Kosovës, Vjosa Osmani, prezantoi potencialin ekonomik të Republikës së Kosovës.

Përmes një postimi në Facebook, Osmani tha se, si e ftuar e Forumit Ekonomik të Zvicrës, foli për mundësitë e shumta për investime në Kosovë.

“Në mesin e arsyeve të shumta për të investuar në Kosovë, përmenda një fuqi punëtore të përgatitur, potencialin e jashtëzakonshëm të të rinjve tanë dhe sukseset e tyre, legjislacionin e bashkërenduar me atë të BE-së, mbrojtjen që u ofrohet investitorëve të huaj dhe shumë arsye të tjera që e bëjnë Kosovën vendin ideal për të investuar”, shkruan Osmani, transmeton Albinfo.ch.

Interesimi i bizneseve e investitorëve për Kosovën, sipas Osmanit, u vërejt shumë qartë. “Ne na mbetet të punojmë fort e të sigurohemi që interesimi i tyre të shndërrohet në investime të suksesshme në vendin tonë”, theksoi ajo.

---