Greqia teston shpërndarjen e medikamenteve me dron

Autoritetet në qytetin veriperëndimor të Trikalës, në Greqi, kryen me sukses të martën testin e parë të fluturimit të një droni që do të përdoret për të shpërndarë medikamente në zonat e izoluara.

Testi u krye në kuadër të një projekti të financuar nga BE-ja, që synon krijimin e mënyrave të reja të transportit, miqësore me mjedisin.

Avioni i telekomanduar u ul jashtë një farmacie dhe më pas në një fermë në një fshat rreth 3 kilometra larg Trikalës dhe me një popullsi prej 200 banorësh.

Programi i financuar nga BE-ja, i quajtur “Harmonia”, synon zbulimin e metodave të transportit që emetojnë karbon të ulët.

Me një angazhim aktiv të farmacive, dronët do të përdoren për të transportuar ilaçe te njerëzit që kanë vështirësi të lëvizin, nëpër fshatra apo shtëpi të izoluara.