1.5 milionë vaksina të administruara në Kosovë

Gjatë 24 orëve të fundit nuk është shënuar asnjë rast i vdekjes nga COVID-19, ndërsa është regjistruar vetëm një rast i ri i infektimit.

Edhe pse gjatë javëve të fundit në Kosovë është shënuar rënie e numrit të të vdekurve dhe e të infektuarve nga koronavirusi, në vendin tonë aktualisht vazhdojnë të jenë 632 raste aktive me COVID-19, shkruan lajmi.net.

Në anën tjetër, masat kundër koronavirusit po vazhdojnë të mbesin në fuqi.

Ministria e Shëndetësisë ka njoftuar sot se deri më tani në Kosovë janë administruar 1 milion e 500 mijë vaksina kundër COVID-19, por ka theksuar se ende nuk ka mbaruar asgjë.

“Ndërsa përballemi me variantin shumë ngjitës Delta të COVID-19, ndryshimi nuk do të vijë nëse nuk punojmë të gjithë së bashku për t’u vaksinuar. Është mbrojtja më e mirë që kemi. Asgjë nuk ka mbaruar akoma”, thuhet në njoftimin e MSH-së.

Në njoftim është thënë se vaksinat e sigurta dhe efektive kundër COVID-19 janë në dispozicion për qytetarët, andaj janë ftuar që të caktojnë terminet e tyre për vaksinim.

Gjatë javës së kaluar kanë qenë kryetarët e komunave dhe Shoqata e Gastronomisë, të cilët kanë kërkuar lirimin e masave nga Qeveria e Kosovës, por një gjë e tillë nuk ka ndodhur.

Kujtojmë se dje në Kosovë janë mbajtur edhe zgjedhjet lokale, të cilat janë përcjellë nga afër për të mbikëqyrur respektimin e masave kundër COVID-19.