Ambasadori i Zvicrës: Në Ministrinë e Jashtme të rekrutohen njerëzit më të mirë që ka Kosova

Ambasadori i Zvicrës në Kosovë, Thomas Kolly, u ka sugjeruar institucioneve të Kosovës që të kujdesen që në Ministrinë e Jashtme të rekrutojnë njerëzit më të mirë.

Në një debat të organizuar nga Instituti Demokratik i Kosovës (KDI) të premten, me temën “Ndikimi i dialogut me Serbinë në politikën e jashtme të Kosovës”, ambasadori zviceran tha se politika e jashtme e një shteti ka ndikim te secili qytetar i Kosovës.

“Nuk është ministri për energji ose për rregullimin e rrugëve (infrastrukturë), ku nevojiten shumë para, edhe Ministria e Punëve të Jashtme ka nevojë për shumë para, por janë shumë të rëndësishëm njerëzit që punojnë në këtë ministri. Në këtë kuptim, rekrutimi i njerëzve më të mirë, është shumë jetik për këtë ministri”, tha ambasadori Kolly, përcjell Albinfo.ch.

Në të njëjtën kohë, diplomati zviceran tha se një proces tjetër shumë i rëndësishëm është edhe anëtarësimi në organizata ndërkombëtare.