Anglia lehtëson hyrjen në vend: Nga sot, mjafton një test antigjen

Në vend të testit të shtrenjtë PCR, nga sot, e diel, atje kërkohet vetëm një test antigjen, i cili duhet të kryhet deri në ditën e dytë pas hyrjes në Angli

Për personat që janë vaksinuar plotësisht, është kapërcyer edhe një pengesë tjetër, sa i përket hyrjes në Angli, shkruan srf.ch duke ju referuar mediave angleze.

Në vend të testit të shtrenjtë PCR, nga sot, e diel, atje kërkohet vetëm një test i shpejtë (antigjen), i cili duhet të kryhet deri në ditën e dytë pas hyrjes në Angli.

Kjo mund të lexohet tashmë në rregullat zyrtare të udhëtimit, transmeton albinfo.ch. Por, megjithatë, ky testim duhet të rezervohet tek ndonjëri nga ofruesit e certifikuar nga qeveria.

Testet janë në dispozicion me çmimin rreth 20 paund (rreth 25 franga).

Kostot e larta për testet PCR (rreth 50 paund, d.m.th. 63 franga për test), të cilat më parë ishin të nevojshme pas hyrjes, përfaqësonin pengesa të larta financiare për shumë britanikë gjatë udhëtimit.

Udhëtarët e vaksinuar, ata që nuk vijnë nga vendet e të ashtuquajturës “Lista e Kuqe”, duke bërë testin në fjalë mund të shpëtojnë të paktën nga karantina.

Në Uells, të njëjtat ndryshime do të hyjnë në fuqi një javë më vonë, përcjell albinfo.ch. Skocia dhe Irlanda e Veriut gjithashtu pritet të ndjekin shembullin e Anglisë.

---