Gjykata Federale e Zvicrës ka konfirmuar dëbimin për gjashtë vjet të një çifti shtetasish të Kosovës, të dënuar për mashtrim të vazhdueshëm me ndihmat sociale. Sipas vendimit, gjatë periudhës kur familja përfitonte mbështetje financiare nga shteti, burri kishte realizuar të ardhura në vlerë prej gjithsej 194’236 frangash, të cilat nuk i kishte deklaruar tek autoritetet sociale, njofton albinfo.ch.
Sipas dokumenteve të rastit, të ardhurat ishin siguruar nga angazhime të përkohshme në disa kompani, pagesa nga sigurimet dhe fitime në kazino. Për t’i mbajtur të fshehura këto të ardhura, bashkëshortja kishte hapur disa llogari bankare në emrin e saj, në të cilat depozitoheshin paratë.
Të dy bashkëshortët kishin nënshkruar vazhdimisht dokumente për llogaritjen e ndihmave sociale, në të cilat deklaronin se nuk kishin të ardhura të tjera. Në këtë mënyrë, autoritetet vazhdonin t’u ofronin mbështetje financiare, pa pasur informacion të plotë për gjendjen e tyre ekonomike.
Rasti ishte trajtuar fillimisht nga Gjykata Rajonale e Jura bernois-Seeland, e cila më 24 prill 2024 kishte dënuar burrin me 28 muaj burgim, prej të cilëve 22 muaj me kusht, si dhe kishte vendosur dëbimin e tij nga Zvicra për gjashtë vjet, transmeton tutje albinfo.ch.
Bashkëshortja ishte dënuar me 15 muaj burgim me kusht, një gjobë dhe po ashtu me dëbim gjashtëvjeçar. Më pas, Gjykata e Lartë e kantonit të Bernës i kishte konfirmuar në thelb këto vendime më 10 shkurt 2026. Për më shumë detaje kliko KËTU
Gjykata Federale lë në fuqi dëbimin, por kthen një pjesë të çështjes në rishqyrtim
Në vendimin e saj të datës 21 tetor 2026, të publikuar më 17 nëntor, Gjykata Federale ka konfirmuar dëbimin gjashtëvjeçar për të dy bashkëshortët, përfshirë regjistrimin e masës në Sistemin e Informacionit Schengen (SIS).
Megjithatë, ankesa e bashkëshortes është pranuar pjesërisht. Gjykata ka shfuqizuar një pjesë të dënimit të saj që lidhet me periudhën nga marsi 2020 deri në gusht 2021 dhe e ka kthyer këtë pjesë të çështjes në gjykatën kompetente për rishqyrtim.
Arsyeja është se, sipas Gjykatës Federale, duhet të shqyrtohet më saktë nëse autoritetet sociale vazhdonin të ishin të mashtruara edhe pasi kishin lindur dyshime konkrete për fshehjen e të ardhurave dhe ishte përfshirë inspektorati social.
Për periudhën e parë, nga qershori 2016 deri në korrik 2019, dënimi për mashtrim të vazhdueshëm është konfirmuar.
Vendimi i Gjykatës Federale mban numrat 6B_238/2026 dhe 6B_265/2026./Albinfo.ch