Sot fillon numërimi i votave me kusht

EPA/RONALD WITTEK

Votat me kusht dhe ato të personave me nevoja të veçanta, Komisioni Qendror i Zgjedhjeve (KQZ) po planifikon t’i numërojë sot, transmeton albinfo.ch.

Zëdhënësi i Komisionit Qendror të Zgjedhjeve (KQZ), Valmi Elezi, në një konferencë për medie të dielën tha se rezultatet përfundimtare për zgjedhjen e kryetarëve të komunave do të bëhet pasi të numërohen votat me kush dhe votat e personave me nevoja të veçanta.

“Rezultatet përfundimtare për zgjedhjen për kryetarë të komunave, pasi të numërohen votat me kusht dhe votat e personave me nevoja të veçanta, planifikojmë të bëhen gjatë ditës së nesërme, si dhe pasi të marrin konfirmimet nga PZAP-i dhe Gjykata Supreme”, tha të dielën Elezi.

Të dielën u bë edhe numërimi i votave jashtë Kosovës të ardhura përmes postës gjatë periudhës 15 shtator – 15 tetor 2021.

Raundi i dytë i zgjedhjeve do të mbahet më 14 nëntor. Fushata do të zgjasë vetëm 5 ditë, pra do të fillojë më 8 nëntor dhe do përfundojë më 12 nëntor.

Në vitin 2017, KQZ-së i janë dashur 9 ditë për të shpallur rezultateve përfundimtare të raundit të parë të zgjedhjeve për kryetarë të komunave dhe 3 ditë të tjera për t’i certifikuar ato.