A do ta bëjë Kosova shërbimin e detyrueshëm ushtarak?

Ministri kosovar i Mbrojtjes, Armend Mehaj tha se shërbimi ushtarak i detyrueshëm do të bëhet vetëm në koordinim me Shtetet e Bashkuara të Amerikës.

Ministri i Mbrojtjes së Kosovës, Armend Mehaj, ka folur sot rreth shërbimit të detyrueshëm ushtarak, për të cilin ka premtuar kryeministri Albin Kurti. Mehaj tha se shërbimi ushtarak i detyrueshëm do të bëhet vetëm në koordinim me Shtetet e Bashkuara të Amerikës.

“Sa i përket ushtrisë së detyrueshme, unë besoj që kjo është ëndërr e çdo qytetari të Republikës të Kosovës, që ta ketë një ushtri të mirëfilltë. Përkohësisht plani është i hartuar për ushtri profesionale, por ne jemi edhe në koordinim e sipër me partnerë e shtete të tjera, për të parë se në çfarë faza mundet ushtria e detyrueshme të futet si obligim në të ardhmen. Por, këtu duhet marrë plane konkrete, siç janë shtetet baltike. Kështu që jemi në koordinim e sipër këtu, por më e rëndësishmja është që në çdo veprim që marrë, unë e koordinoj bashkë me SHBA-në që të jetë në benefit të Kosovës dhe Ushtrisë të Kosovës”, tha Mehaj, transmeton Albinfo.ch.

Këto deklarime Mehaj i bëri para deputetëve të Komisionit për Punë të Jashtme dhe Diasporë, ku raportoi lidhur me anëtarësimin e Kosovës në NATO.

---