Mjekët zviceranë: Turistët që ktheheshin nga jashtë, sollën “mikrobe rezistente”

Sipas mjekëve në Spitalet Universitare të Gjenevës (HUG)

Pacientë të shumtë me Covid që duhej të riatdhesoheshin në Zvicër nga spitalet e huaja pas pushimeve verore, “importuan” jo vetëm vetë virusin, por edhe “baktere rezistente”, sipas mjekëve në Spitalet Universitare të Gjenevës (HUG), përcjell albinfo.ch.

“Që nga gushti, 100 për qind e të gjithë pacientëve me Covid që janë zhvendosur këtu, nga njësitë e kujdesit intensiv jashtë vendit kanë qenë bartës të baktereve shumë rezistente”, tha Stephan Harbarth, mjek i lartë në higjienën spitalore dhe sëmundjet infektive në HUG.

Problemi kryesor me këto baktere është se ato nuk reagojnë ndaj antibiotikëve më të përdorur dhe për të parandaluar përhapjen e këtyre mikrobeve, pacientët e infektuar duhet të zhvendosen në dhoma private, duke kontribuar në mungesën e shtratërve.

Spitali Universitar në Cyrih (UHZ) po përballet me një situatë të ngjashme, pasi “mikrobet mbi të cilët antibiotikët e zakonshëm nuk funksionojnë më, janë gjetur në mënyrë të përsëritur te pacientët e riatdhesuar”, sipas Walter Zingg, kryemjek i UHZ për sëmundjet infektive dhe higjienën spitalore.

---