Ndeshje miqësore me mesazhe tolerance, mes FC Kosova dhe FC Hakoah

Fondacioni Kundër Racizmit dhe Antisemitizmit (GRA) organizon ndeshjen miqësore në mes të FC Kosova Zürich dhe FC Hakoah ZH 

Në vazhdimësi ndodhin incidente raciste apo diskriminuese në futbollin zviceran, pa marrë parasysh a ndodh kjo në futbollin profesional apo në turnetë e ekipeve të fshatrave.

Por tani, klubet futbollistike FC Kosova Zürich dhe FC Hakoah ZH  kanë vendosur të japin një mesazh të rëndësishëm të tolerancës, diversitetit dhe respektit të ndërsjellë në këtë drejtim, shkruan në një njoftim të tij, Fondacioni Kundër Racizmit dhe Antisemitizmit (GRA), transmeton albinfo.ch.

Të dielën, më 14 nëntor, me fillim në orën 12:30 dy klubet do të takohen për një lojë miqësore, me ekipet e tyre të përziera, nën moton “Për një të ardhme të përbashkët në Cyrihun tonë.

Në mes të ndeshjeve, menaxherja e GRA, Dina Vyler  do të zhvillojë një bisedë të shkurtër midis këshilltarit qeveritar (ministrit) të Kantonit të Cyrihut, Mario Fehr, deputetes kantonale, Sonja Rueff, asambleistit të qytetit të Cyrihut, Përparim Avdili dhe përfaqësuesve të të dy klubeve të futbollit.

---