Rikthehet mësimi plotësues në gjuhën shqipe në Ticino

Pas shumë vjetëve, Swiss Albanian Women – Ticino, në bashkëpunim me LAPSH Zvicër rikthyen mësimin plotësues në gjuhën shqipe në Ticino.

Në Liceo Kantonal të Bellinzones, me një ceremoni modeste, më 18 shtator 2021, u përurua fillimi i vitit shkollorë 2021/2022, ku filluan mësimin 10 nxënës nga klasa e parë fillore deri te klasa e 9-të.

Na nderoi me ardhjen e tij kryetari i LAPSH-it, z. Nexhat Maloku, i cili me një fjalë rasti përgëzoj zonjën Lindita Osmani, ish-nxënëse e shkollës shqipe, për iniciativën si dhe shoqatën Swiss Albanian Women – Ticino për punën dhe vullnetin e nënave për të rihapur shkollën.

Zonja Osmani foli për rëndësinë e kësaj arritje, si dhe i falënderoj prindërit për bashkëpunimin dhe interesimin për shkollën shqipe. Ajo theksoi se SAW-TI është duke vazhduar punën e paraardhësve të tyre dhe se vetëm fal punës së tyre dhe vetëdijesimit të prindërve ne arritëm që sot të jemi këtu. Një falënderim i veçantë shkoi edhe për ato nëna që u bashkuan që të realizohet ky projekt kaq i duhur e i qëlluar.

Në këtë rast u dhuruan dy mirënjohje nga shoqata për t’i nderuar për punën e tyre të palodhshme ish-mësuesin z. Hazbi Gubetinin dhe z. Mustaf Kryeziun, ish-kryetari i Lidhjes së arsimtarëve dhe prindërve në Kanton Ticino, njëherësh edhe anëtar i kryesisë se LAPSH-it në Zvicër.

Mësuesja Melihate Durmishi përshëndeti nxënësit e saj, prindërit e të gjithë të pranishmit, i ftoi nxënësit të shkojnë në klasë për të filluar kështu dita e parë e mësimit.

TV RIVIERA 24 ndoqi nga afër gjithë ceremoninë, ku me përkushtim e përcolli festën duke filmuar, fotografuar dhe duke intervistuar të pranishmit.

Një muaj më vonë, më 16 tetor 2021, në Bellinzona u hap dhe paralelja e dytë, me mësuesen Safete, duke përfshirë edhe nxënësit e grupmoshave parashkollore.