A po bën Spanja kthesë historike në raport me Kosovën?

Gazeta spanjolle “The Objective” thotë se kryeministri i Spanjës, Pedro Sanchez, është duke përgatitur një kthesë historike sa i përket pozicionit të Madridit zyrtar lidhur me Kosovën.

Sipas kësaj gazete, një lëvizje e tillë do të nënkuptojë edhe pranimin de-fakto të pavarësisë së Republikës së Kosovës.

Raportimin e saj “The Objective” e mbështet te burime diplomatike, të cilat thonë se fillimisht Spanja pritet të hapë një Zyrë Tregtare dhe Kulturore në Prishtinë. Një veprim i tillë do të bëhet duke ndjekur modelin e Franco-s me BRSS-në, pra pa nënkuptuar njohjen e plotë.

Më pas hapat e tjerë. Megjithatë, burime diplomatike nga Zyra për Informim Diplomatik i kanë thënë gazetës se këto opsione nuk janë në tryezë për momentin, pasi të tjera ide janë duke u studiuar. Lidhur me çështjen e njohjes së Kosovës nga Spanja foli më herët Sekretari i Shtetit për BE-në, Juan Gonzales-Barba, i cili tha se Spanja nuk do ta njohë në rrugë diplomatike Kosovën përsa kohë nuk ka një marrëveshje mes të Prishtinës dhe Beogradit.

Megjithatë, për të parën herë ai i hapi derën bashkëpunimit me institucionet e Kosovës. Ai deklaroi hapur se Spanja dëshiron të jetë më e përfshirë në rajon dhe një strategji e tillë do të ishte e çalë nëse vazhdohet me injorimin total të Kosovës.

“Duhet bërë disa marrëveshje kompromisi dhe ne jemi duke shqyrtuar pikërisht disa forma për këtë”, është shprehur ai.

Gonzalez-Barba shtoi se vendimi i Spanjës “do të merret shpejt dhe do të bëhet publik”, duke nënkuptuar se një hap diplomatik është i pashmangshëm.