Vjenë: Mësues dhe nxënës festojnë Ditën e Flamurit

Jemi në prag të Festës së 28 Nëntor, Dita e shpalljes së Pavarësisë së Shqipërisë. Shumë mërgimtarë, shoqata e shkolla, organizojnë aktivitete të ndryshme për këtë festë, transmeton albinfo.at.

Në bashkëpunim me Shoqatën e Mësuesve Shqiptarë “Naim Frashëri” në Vjenë u organizua mbrëmje tematike “orë letrare me nxënës dhe mësues për nder të 28 Nëntorit-Ditës së Flamurit”.

Morën pjesë mësuesit e Shoqatës “Naim Frashëri”, prindër dhe mbi të gjitha nxënës që ndjekin mësimin e gjuhës shqipe në Austri, si në sistemin e shkollave shtetërore, ashtu edhe jashtë tij. Pas përshëndetjeve të rastit nga Ambasadori Roland Bimo, si mikpritës i aktivitetitit dhe Kryetares së Shoqatës “Naim Frashëri”, znj. Miradije Berisha, pjesëmarrrësit në këtë aktivitet ndoqën me interes dhe kënaqësi recitimet e nxënësve Edon Cekaj e Anuar Asipi, të drejtur nga mësuese znj. Antigone Elshani, nxënësit Anna Maria Koçi, Leandra Gjonej e Albanot Kuçi nën drejtimin e mësuese Ina Arapi, Adea Zenelaj dhe Jon Bacalliu, të udhëhequr nga mësuesi Ibrahim Hasani. Më tej programi vazhdoi me recitimet e nxënësve të znj. Miradije Berisha, Vjosa e Anisa Shala dhe lojën në violinë të Dora Alihajdaraj.

Mësuesi Osman Ademi, aktivist i dalluar i Shoqatës “Naim Frashëri” dhe komunitetit shqiptar në Austri udhëhoqi në këtë aktivitet nxënësit Adrian Ademaj, Anika Kodra, Fatlind Ademi, Ejona Rugova e Ilire Qestaj.

Ambasadori R. Bimo falënderoi mësuesit për përkushtimin e tyre të veçantë, si dhe aftësinë për të sjellë gjithnjë e më shumë pranë fëmijëve vizionin e përbashkët për dobinë e gjuhës shqipe, jo vetëm për të ruajtur traditën, por edhe në shërbim të së ardhmes për fëmijët shqiptarë në diasporë.

Ambasada falënderon Shoqatën e Mësuesve për përgatitjen serioze të aktivitetit, si dhe nxënësit për emocionet e veçanta që dhuruan.