Kosova po harton një ligj të ri për mbrojtjen nga dhuna në familje

Foto ilustrim

Kryeministri i Kosovës, Albin Kurti, njoftoi për hartimin e një ligji të ri për mbrojtjen e viktimave të dhunës në familje, gjatë një takimi me drejtorët e strehimoreve në vend, ditën e sotme.

Ofrimi i shërbimeve të specializuara mbështetëse për viktimat e dhunës në familje dhe roli i strehimoreve në mbrojtjen dhe rehabilitimin e tyre, përbën thelbin e diskutimit.

Albin Kurti vlerësoi punën e strehimoreve si partnere në luftimin e dhunës në familje, të përfshira drejtpërsëdrejti në mbrojtjen e grave që janë pre e dhunës, si dhe fëmijëve të tyre.

“U bisedua për nismat e ndërmarra nga Qeveria për infrastrukturë të re ligjore, hartimin e Ligjit të ri për mbrojtje nga dhuna në familje, si dhe Strategjinë për Mbrojtje nga Dhuna në Familje dhe Dhuna ndaj Grave 2022-2026”, thuhet në komunikatën e Qeverisë së Kosovës.