Ndërpritet furnizimi me ngrohje për të gjithë qytetarët e Prishtinës

Ndërmarrja publike “Termokos” ka njoftuar se janë detyruar ta ndërpresin furnizimin me ngrohje për të gjithë konsumatorët.

Sipas Termokos-it, arsye për këtë është pamundësia për t’u furnizuar me avull nga KEK-u.…

“NP “Termokos” Sh.A. njofton opinionin e gjerë, përkatësisht të gjithë konsumatorët se për shkak të pamundësisë për t’u furnizuar me avull nga KEK-u, jemi detyruar të ndërpresim furnizimin me ngrohje për të gjithë konsumatorët”, thuhet në njoftim.

Aktualisht, me ngrohje janë duke u furnizuar vetëm klinikat e QKUK-së nëpërmes ngrohtores, që gjendet në hapësirat e kësaj qendre spitalore.

“Kërkojmë mirëkuptimin e konsumatorëve tanë deri në përmirësimin e situatës dhe rikthimit të furnizimit me ngrohje”, thuhet në njoftimin e Termokosit.

KEK-u ka reaguar, duke thënë se sipas planeve, njësia B1 pritet të kthehet në prodhim nesër në mëngjes, kur edhe do të krijohen kushtet për furnizimin e “Termokos”-it me avull për ngrohje qendrore.

“Korporata Energjetike e Kosovës njofton opinionin se aktualisht në TC-Kosova A kemi një gjendje stabile, ku në punë janë të tri njësitë aktive ( A3,A4 dhe A5) që prodhojnë rreth 390 MW/h. Ndërsa në Kosovën B, deri në mesnatë sot ishte në punë njësia B1. Sido që të jetë, për shkak të një rrjedhje në kaldajën e njësinë B1, ishim të detyruar të ndalim edhe këtë në mesnatë. Ekipet e specializuara kanë filluar menjëherë përgatitjet për intervenim në sanimin e gjendjes. Sipas planeve, njësia B1 pritet të kthehet në prodhim nesër në mëngjes, më 16.12.2021 , kur edhe do të krijohen kushtet për furnizimin e Termokosit me avull për ngrohje qendrore. Duke falënderuar palët e përfshira për mirëkuptim dhe bashkëpunim, KEK është duke bërë përpjekje maksimale për prodhim të qëndrueshëm me energji në kushtet aktuale të krizës sezonale dhe globale energjetike”, thuhet në reagimin e KEK-ut.