Kroacia, e gatshme ta mbështesë Kosovën për anëtarësim në NATO

Në një konferencë për media, ministri i Mbrojtjes së Kroacisë, Mario Banoziq, tha se shteti i tij do ta ndihmojë Kosovën për anëtarësim  në NATO e institucionet e tjera.

Ai pas takimit me homologun kosovar, Armend Mehaj, shtoi se të ofrojnë ndihmë edhe në fushën e trajnimeve dhe shkollimit të pjesëtarëve të FSK-së.

“E kemi thelluar bashkëpunimin dhe partneriteti do t’i shërbejë thellimit të bashkëpunimit në fusha të ndryshme. Kroacia mund t’i ofrojë ndihmë Kosovës dhe përkrahim anëtarësimin e Kosovës në institucione euroatlantike”.

“Ne e mbështesim procesin e transformimit të FSK-së në Forca të Armatosura. Dhe, ofrojmë ndihmë në fushën e trajnimeve dhe shkollimit. Unë dëshiroj të vazhdojmë të kemi bashkëpunimin tonë dhe të bëhet shkëmbimi i njohurive ndërmjet forcave tona. Takimi ynë është konfirmim i fuqishëm i bashkëpunimit miqësor”.

Përderisa Mehaj tha se është e rëndësishme të punohet për interesa strategjike e të përbashkëta, për çka sqaroi se e ka marrë mbështetjet e ministrit kroat, raporton EO.

“Marrëdhëniet tona nuk janë vetëm diplomatike, por edhe më tej. Kjo miqësi e ka pasur momentin kulmor më shumë se dy dekada kontribut që nderon vendet tona. Së bashku nënkupton interesa strategjike  angazhim të përbashkët në mbarë globin”.

“Angazhimin për paqe e siguri. Këtë miqësi e kurorëzojmë sot me nënshkrimin e marrëveshjes për mbrojtje. Hap rrugë për trajnime ushtarake, bashkëpunim më të theksuar në industrinë e mbrojtjes”.

“Kroacia ka treguar gatishmëri për të na ndihmuar gjithmonë, jo vetëm na takimin sot, por edhe në takime të tjera ka treguar mbështetje. Gjithmonë ka vend për më shumë bashkëpunim”.