Mashtrim në shkallë të gjerë: 6.000 certifikata të falsifikuara në St.Gallen

Ky është rasti më i madh i mashtrimit që përfshin certifikatat Covid në Zvicër deri më sot. 100 certifikata tjera të rreme janë zbuluar në Bernë

Në kantonin e St. Gallen, autoritetet kanë zbuluar një rrjet falsifikuesish të certifikatave Covid-19. Gjithsej rreth 6,000 certifikata Covid thuhet se janë falsifikuar, transmeton albinfo.ch. Ky është rasti më i madh i mashtrimit që përfshin certifikatat Covid në Zvicër deri më sot.

E pyetur nga Radio SRF, prokuroria publike e St. Gallenit ka konfirmuar se është në dijeni për këtë rast dhe se hetimet janë duke vazhduar. Ajo nuk dëshiron të japë informacione të mëtejshme për momentin, për të mos rrezikuar hetimet.

Informacioni i plotë do të jepet në një datë të mëvonshme, bën të ditur CH-Media.

Edhe në Bernë është zbuluar një grup falsifikuesish të certifikatave.
Policia e kantonit të Bernes ka arrestuar dy persona që punojnë në spitalin e Moutier sepse dyshohet se kanë falsifikuar certifikatat e Covid-19, transmeton albinfo.ch. Ata ndodhen në paraburgim.

Sipas një deklarate nga policia e kantonit të Bernës, hetimet fillestare kanë zbuluar se ishin lëshuar më shumë se njëqind certifikata të supozuara të falsifikuara. Sipas informacioneve fillestare, certifikatat e dyshuara si të falsifikuara janë vënë në dispozicion pjesërisht pa pagesë dhe pjesërisht kundrejt pagesës.

---