Skip to content

Avioni i Swiss-it ndërpret tri herë radhazi tentativën për ngritje në Cyrih

(KEYSTONE/Christian Merz)

Pasagjerët e fluturimit LX2110 nga Cyrihu drejt Malagës përjetuan tri tentativa të dështuara për ngritje të martën. Piloti dyshohet se ka përmendur një problem me levën e shtytjes së motorëve. Në fund, udhëtarët vazhduan udhëtimin me një aeroplan tjetër.

Pasagjerët e fluturimit LX2110 të kompanisë ajrore Swiss, që duhej të udhëtonin nga Cyrihu drejt Malagës në Spanjë, përjetuan momente të pazakonta të martën, pasi aeroplani ndërpreu tri herë radhazi tentativën për ngritje, përcjell albinfo.ch.

Bëhet fjalë për një aeroplan të tipit Airbus A220. Sipas një dëshmitari që ndodhej në bord dhe që ka folur për gazetën zvicerane “Blick”, gjatë secilës tentativë aeroplani fillimisht përshpejtonte në pistë, por pilotët më pas frenonin papritur dhe ndërprisnin ngritjen.

Pas tentativës së parë, situata u përsërit edhe dy herë të tjera, duke shkaktuar shqetësim dhe paqartësi te pasagjerët.
Piloti përmendi problem me levën e shtytjes
Sipas dëshmitarit, kapiteni i aeroplanit u kishte shpjeguar pasagjerëve se problemi lidhej me një levë të shtytjes së motorëve, e cila kishte dalë nga pozicioni i saj.

Leva e shtytjes përdoret nga pilotët për të kontrolluar fuqinë e motorëve dhe për të përcaktuar forcën me të cilën aeroplani përshpejton gjatë ngritjes.

Pas ndërprerjes së tri tentativave, pasagjerët nuk vazhduan udhëtimin me të njëjtin aeroplan. Swiss organizoi një aeroplan tjetër, me të cilin udhëtarët mundën të niseshin drejt destinacionit të tyre në Spanjë. /Albinfo.ch